Articles - Newsflash

A A A

world face earth 830x553

 

ከአመታት በፊት የሚስዮናውያንን ሥልጠና ለመካፈል ወደ ምዕራብ ኢትዮጵያ አቅንቼ ነበር፡፡ በመድረሻዬ ከቀናት በኋላ በቅርብ ከማውቀው ሚስዮናዊ ጋር የተልዕኮወን ጉዳይ አንስተን የተላከበትን ሕዝብ በወንጌል በመድረስ ሂደት ስለሚገጥሙት ችግሮች እና ዕክሎች ተወያየን፡፡ በውይይታችን መሐል ‹‹የሚስዮናውያን ዕጥረት አለ አይደል?›› ብዬ ጠየኩት፡፡ ግልጽ የሆነ በዕልህ እና በቁጭት የተሞላ መልስ ነበር የጠበኩት፡፡ እንደጠበኩት ግን ስሜታዊ ሆኖ አልመለሰልኝም፡፡ ‹‹ከምንጊዜም በላይ ብዙ ሚስዮናውያን ይህንን ሕዝብ ለመድረስ የተሰማሩብት ጊዜ ላይ እንገኛለን፡፡›› አለኝ፡፡ ደነገጥሁ፡፡ ቀጠሎም ‹‹በዕርግጥ ለተልዕኮ ስራው ሁሌም ቢሆን ሰራተኞች ጥቂቶች ናቸው ነገር ግን አሁንም ከገባንበት አዙሪት መውጣት አልቻልንም፡፡ ይህ ሕዝብ መደረስ አለበት!›› አለኝ፡፡ ይህንን ሲናገር በሚስዮናዊው ፊት ላይ የድካም እና የተስፋ መቁረጥ የሚመስል ስሜት አነበብሁበት፡፡

የገባንበት ‹‹አዙሪት››

የሚስዮናዊው ንግግር ያልጠበኩት ከመሆኑም በላይ ‹‹የገናባንበት አዙሪት››ን ለማወቅ ደግሞ ሌላ ጉጉት ያዘኝ፡፡ ምንድነው ሚስዮናውያኑ ገባንበት የሚሉት አዙሪት? የሚለው ጥያቄ አይምሮዬን ወጥሮኝ አደረ፡፡ ይሄ የተልዕኮ አዙሪት ዶ/ር መረራ ጉዲና ስለ ኢትዮጵያ ፖለቲካ ደጋግመው ሲናገሩ እንደሚጠቅሱት ‹‹ቡዳ›› ክርስቲያናዊ ተልዕኮ አቅጣጫን ያለዕድገት ያስቀረ መሆን አለበት ብዬም አሰብሁ፡፡

ስለዚህም ይህንን የተልዕኮ ‹‹አዙሪት›› ምንነት ለመረዳት ሰፋ ያለ ጥናት ለማድረግ ከሚስዮናውያን ፣ ከተልዕኮ አስተማባሪዎች (‹‹አስተማባሪ›› የሚለው ቃል አስተማሪ ፣ አስተባባሪ እና አሰማሪ የሚሉት ቃላት ጥምረት ሲሆን “Mobilizer” ለሚለው የእንግሊዘኛ ቃል አቻ ይሆናል በማለት የፈበረኩት ጋሽ ንጉሴ ቡልቻ ናቸው ይባላል) እንዲሁም በጊዜው ካገኘኋቸው ከአብያተክርስቲያናት መሪዎች ጋር ስወያይ ከረምሁ፡፡ የገባንበትን የተልዕኮ አዙሪት ለማስረዳት ሁሉም ተመሳሳይ ዓረፍተነገር ይጠቀማሉ - ‹‹ዐውድንና አውዳዊነትን አለመከተል››!

ይህ ዓረፍተነገር በደፈናው አይገባም፡፡ ዐውድን አለመከተል ምን ማለት ነው? የወንጌል ተልዕኮንና ዐውዳዊነትን ምን አገናኛቸው? የሚሉ ጥያቄዎች መነሣታቸው አይቀርም፡፡ እነዚህን ጥያቄዎች በአጭሩ ለማስቀረት ያህል ‹‹ዐውድ›› ሲባል በሚስዮናውያኑ አጠቃቀም የአንድ ማህበረሰብ የአኗኗር ዘይቤ እንደማለት ነው፡፡ በኢትዮጵያ ገነት ቤተክርስቲያን የ10/40 አገልግሎት መስራች እና ዳይሬክተር የሆኑት ጋሽ ተክሉ ወልዴ ‹‹ዐውዳዊነት››ን በተመለከተ እንዲህ ይላሉ፡- ‹‹ዐውዳዊነት ወደየትም ሥፍራ ሄደን በሕዝቡ መሃል ከሕዝቡ ጋር የምንኖርበት ተመሳሳይ የኑሮ ዘይቤ ነው፡፡ ዐውዳዊነት የሕዝቡን ማኅበራዊ፣ ሃይማኖታዊና ባህላዊ እሴቶችን በተገቢው መንገድ በመረዳት ማክበር ነው፡፡ ዐውዳዊነት የሕዝቡን ፖለቲካዊ፣ ታሪካዊና መልክአ ምድራዊ አቀማመጥ ከግምት ያስገባ ሥራ ነው፡፡ ዐውዳዊነት የራሳችን ማንነትና እምነት እንደተጠበቀ ሆኖ የወንጌልን እውነት መረዳት በሚችሉበት በራሳቸው ማንነትና ሃይማኖት በኩል ማቅረብ ነው፡፡ ዐውዳዊነት የያዝነውን መልዕክት በሕዝቡ ባህል ጠቅልለን (ሥጋ አልብሰን) ማቅረብ ነው፡፡ ዐውዳዊነት መልዕክቱን እንዴት ባቀርብ ደስ ይለኛል ወይም ይመቸኛል ሳይሆን፣ መልዕክቱን እንዴት ባቀርበው ይደመጣል ብሎ ያስባል፡፡››

ወንጌል የአንድን ማህበረሰብ ዓውድ በመጠቀም ለማህበረሰቡ አባላት መድረስ አለበት፡፡ በየትኛውም የዓለማችን ክልል የሚገኙ ሕዝቦች የራሳቸው የሆነ ባህል አላቸው፡፡ ባህልም በራሱ ክፉ አይደለም፡፡ በወንጌል የምንደርሰው ሕዝብ የራሱ ባህልና ወግ እንዳለው ሁሉ ይህንን ሕዝብ ለማገልገል የሚላከው አገልጋይም እንዲሁ የራሱ የሆነ ባህልና አውድ አለው፡፡  ሰዎችን ሁሉ አንድ የሚያደርግ ዕውነት አለ፡፡ ይህ ዕውነት በሁለት የተለያዩ ባህሎች የሚኖሩ ሰዎች እንዲቀራረቡ ድልድይ ሆኖ ያገለግላል፡፡ ባህል በጥቅሉ ኃጢያት አይደለም፣ ማንነት የሚገለጥበት ነው፣ በቀላሉ የሚወገድ አይደለም ለዚህም ነው ነጮቹ “A text without its context is a pretext” (አውድን ያላገናዘበ ትርጉም ወደተሳሳተ ድምዳሜ ያደርሳል) የሚሉት፡፡ አንድን ማህበረሰብ በወንጌል ለመድረስ ያንን ማህበረሰብ ዐውድ መገንዘብ ያስፈልጋል!

እንግዲህ አዙሪቱ ዐውዳዊነትን አለማወቅ እና አለመከተል ማለትም ሚስዮናውያን እና አብያተክርስቲያናት በወንጌል የሚደርሷቸውን ሕዝቦች ባህል እና አኗኗር አለማወቅ እና አለመረዳት እንዲሁም ባህሉን እንደወንጌል ዐውድ በመጠቀም ለመድረስ ጥረት አለማድረግ መሆኑ ነው፡፡ ሚስዮናዊው ወዳጄም ይህንን ክፍተት በራሱም በሌሎች ሚስዮናውያን ላይም እንደተመለከተ አልደበቀኝም፡፡ እኔም በግሌ እንዳስተዋልሁት እንዲሁም እንዳጠናሁት ዐውድን ጠብቆ የወንጌልን መልዕክት በማቅረብ ደረጃ ክፍተት አለብን፡፡

የአዙሪቱ ጡዘት

በቅርቡ ወደ ጅግጅጋ ለተመሳሳይ ጉዳይ አቅንቼ የተመለከትኩትም ይህንኑ የሚያረጋግጥ ነው፡፡ የሶማሌ ክልል ሕዝበ 99.7 በመቶ የእስልምና ዕምነት ተከታይ ሲሆን ከክልሉ ነዋሪዎች 0.3 በመቶ የሚሆኑት ብቻ ክርስቲያን አልያም የሌላ እምነት ተከታዮች ናቸው፡፡

እንደ ጅግጅጋ ወንጌላውያን አብያተክርስቲያናት ዋና ጸሐፊ መጋቢ ጋሹ ገ/ዩሐንስ ከሆነ በጅግጀጋ ብቻ በወንጌላውያን አብያተክርስቲያናት ስር አስር አብያተክርስቲያናት ይገኛሉ፡፡ ጅግጅጋን አስቀድማ የረገጠችው የኢትዮጵያ ቃለ ሕይወት በ SIM ሚስዮናውያን (በ1950ዎቹ) አማካይነት ስትሆን በመቀጠል የኢትዮጵያ ሙሉ ወንጌል አማኞች ቤተ ክርስቲያን ትከተላለች (በ1960ዎቹ) ፡፡ ስለዚህ ወንጌል ወደ ሶማሌ ምድር ከረገጠ ከ60 አመት በላይ አስቆጥሯል፡፡  አሁን እንጠይቅ! በአሁኑ ሰዓት ምን ያህል የሶማሌ ሕዝብ ወንጌሉን አምኖ ድኗል? ይህንን ጥያቄ መመለስ በስፍራው ለሚያገለግሉ ብዙዎች ልብን የሚሰብር እና ድካም ውስጥ የሚከት ነው፡፡

በአጠቃላይ በአሁኑ ወቅት በአስሩ አብያክርስቲያናት ስር ካሉት አባላት የሶማሌ ብሔረሰብ ተወላጅ ሆነው ከእስልምና ወደ ክርስትና የመጡት ሰዎች ሶስት ወይም አራት ቢሆኑ ነው፡፡ ከእነርሱ ውጭ 99 በመቶ ወንጌላውያን አብያተክርስቲያናቱን የሞሉት ከመሐል ፣ ከደቡብ እና ከሰሜን ኢትዮጵያ ለስራ የጅግጅጋ መጥተው የቀሩ ክርስቲያኖች ናቸው፡፡ እንደ ጋሽ ተክሉ አገላለጽ እነዚህ አብያተክርስቲያናት ‹‹ሶማሌ ላይ ያሉ የአዲስ አበባ አብያተክርስቲያናት›› ናቸው፡፡ ሶማሌ ክልል ውስጥ ይገኙ እንጂ የሶማሌ ግን አይደሉም፡፡ ሶማሌዎች አይገቡባቸውም፡፡ በሶማሊኛ አይዘመርም፡፡ በሶማሊኛ አይሰበክም፡፡ ይህ ደግሞ የአዙሪቱ ጡዘት ነው፡፡

‹‹የሶማሌን ሕዝብ ዐውድ ልንቀበል ስላልፈቀድን ሶማሌዎች ወደ እኛ አይመጡም›› አለችኝ ስለዚህ ጉዳይ ያናገርኋት በድሬዳዋ የምታገለግል ሚስዮናዊት፡፡ ጥያቄዬን ቀጠልኩ፡፡ በጅግጅጋ ወንጌላውያን አብያተክርስቲያናት ስር ከሚያገለግሉ ወደ 50 ከሚጠጉ ሙሉ ጊዜ አገልጋዮች መካከል ስንቶቹ የሶማሊኛን ቋንቋ አቀላጥፈው በመናገር ለሶማሌዎች ወንጌልን ማድረስ ይችላሉ? መልስ ፡- ሁለት የሙሉጊዜ አገልጋዮች ብቻ!

እነዚህ አሃዞች በእርግጥ በአከባቢው ያሉ የአብያተክርስቲያናት መሪዎችንም የሚያስጨንቁ እንደሆኑ ተረድቻለሁ፡፡ በዚህ ጉዳይ ላይ ብዙ ስብሰባ እና ውይይት እንደተደረጉም አውቃለሁ፡፡ ከሁሉም በላይ የጅግጅጋ አብያተክርስቲያናትን ለምሳሌ አነሳሁ እንጂ እውነታው ግን ተዘዋውሬ እንዳየሁት ይህ በአብዛኛው በወንጌል ያልተደረሱ አከባቢዎችን ግልጽ አድርጎ የሚያሳይ ነው፡፡ የምንደርሰውን ማህበረሰብ ባህል በማወቅ በዐውዳቸው ልንደርሳቸው ስላልቆረጥን የተላክንበት ማህበረሰብ ዘንድ ውጤታማ የወንጌል ስራ እየሰራን አይደለም፡፡

አዙሪቱ በከተሞች   

ሚስዮናዊነት የከበረ ጥሪ ነው፡፡ ስለ ዓውዳዊነት ስናነሳ የሚስዮናውያንን ስህተት ለማጉላት ሆኖ መታሰብ የለበትም፡፡ በእግዚአብሔር ጥሪ ወደ መከሩ ከተሰማሩት ሚስዮናውያን በላይ የዓውዳዊነት ጉዳይ የእያንዳንዱ የከተሜዎች አማኝ ጉዳይ ከሆነ ሰነባብቷል፡፡

በአዲስ አበባ ቦሌ ክፍለ ከተማ ልዩ ስሙ ቦሌ ሚካኤል በሚባለው አከባቢ እጅግ በጣም ብዙ ሶማልያውያን (የክልል አምስት ሶማሌ ተወላጆች ‹‹ሶማሌዎች›› ሲባሉ ከውጭ በስደት መጥተው አዚህ የሚኖሩት ደግሞ ‹‹ሶማሌያውያን›› ይባላሉ) ይኖራሉ፡፡ አሁን አሁን ደግሞ ብዙ ሶርያውያን በአከባቢው ይታያሉ፡፡ የአዲስ አበባ አብያተክርስቲያናት ዐውዳዊነትን የሚፈታተነው እውነት ታዲያ እነዚህ ሶማሌዎች በሚኖሩባው አባቢዎች ብዙ የወንጌላውያን አብያተክርስቲያናት መገኘታቸው ነው፡፡ እነዚህን ማሕበረሰቦች በወንጌል ለመድረስ የግድ ባህላቸውንና ቋንቋቸውን ማወቅ እንዲሁም ከእነርሱ ጋር መወዳጀት ያስፈልጋል፡፡ በዚህ ስራ ግን አሁንም ብዙ ይቀረናል፡፡ በአከባቢው የሚገኝ አንድ የወንጌላውያን ቤተክርስቲያን በቅርብ ትልቅ ሕንጻ እንደገነቡ አውቃለሁ፡፡ ይህ ሕንጻ ከአዙሪታችን የሚያወጣን አንድ መፍትሔ ይዞ ቢመጣ መልካም ነው ካልሆነ ግን አልጠቀመንም፡፡

አዲስ አበባ የብዙ ብሔር ብሔረሰቦች መኖሪያ መሆኗ በፊት ሚስዮናውያን ሲላክባቸው የነበሩ ሕዝቦች አሁን ወደ አዲስ አበባ መጥተው ጎረቤታችን ሆነዋል፡፡ የአዲስ አበባ አብያተክርስቲያናት በወንጌል ያልተደረሱት የውጭ ሶማሌያውያን ፣ ኤርትራውያን ፣ ሱዳናውያን እንዲሁም ቻይኖችን ተጎራብተዋል፡፡ ይህ እንግዲህ የአዙሪቱ ጥሪ ነው፡፡ ዐውዳዊነት እዚህ ጋር ነው የሚፈተሸው፡፡ ባህላቸውን አክብረንና ቋንቋቸውን ተምረን ተወዳጅተናቸው ወንጌልን እንነግራቸው ይሆን ወይስ እኛ ‹‹አዲስ አበቤ›› ሆነን እንቀር ይሆን?

እንደ አዲስ አበባ ፣ ሐዋሳ ፣ አዳማ ወዘተ ያሉ ከተሞቻችን በዓውዳዊነት ፈተናዎች ውስጥ ናቸው፡፡ የሐዋሳ አብያተክርስቲያናት ሐዋሳ እንደ ቀደሙት ዘመን የ‹‹ክርስቲያን ከተማ›› ሆና እንደማትዘልቅ ይገነዘቡታል፡፡ የአዳማ አማኞች በወንጌል ያልተደረሱት ከረዩንና ምስራቅ እና ምዕራብ ሐረርጌዎችን ችላ ማለት እንደማይቻል ያውቁታል፡፡ ነዋሪዎች ከገጠር ወደ ከተማ የሚያደርጉት ፍልሰት እጅግ እየጨመረ ከመምጣቱ የተነሳ ከተሞች በወንጌል ባልተደረሱ ሕዝቦች እየተሞሉ ነው፡፡ ይህ ደግሞ የተልዕኮው አዙሪት ወደ ከተሞችም እየመጣ እንደሆነ ጠቋሚ ነው፡፡

አዙሪቱን መግታት  

በኢትዮጵያ ያልተደረሱ ህዝቦች ላይ ሰፊ ጥናት ያደረጉት ዶ/ር ሳሙኤል ክብርዓብ በቅርቡ “peoplegroupsethiopia.net” የሚባል ድረ ገጽ ይፋ አድርገዋል፡፡ ድረ ገጹም በሐገራችን በወንጌል ያተደረሱ ሕዝቦችን እንዲሁም በውስጣቸው የሚገኙ የአማኞች ብዘትን በዝርዝር ያስቀምጣል፡፡ ከመረጃው ማየት እንደሚቻለውም ወንጌል ያልገባባቸው እጅግ ብዙ ማህበረሰቦች እንዳሉ ነው፡፡ እግዚአብሔር ለእነዚህ ሕዝቦች ያለው ዕቅድ ምንድነው? ብለን የጠየቅን እንደሆነ የምናገኘው መጽሐፍ ቅዱሳዊ መልስ ‹‹ሁሉ እንዲድኑ እና እውነትን ወደ ማወቅ እንዲደርሱ›› ነው (1ኛ ጢሞ 2፡4) ፡፡

ጌታችን ኢየሱስ ክርስቶስም ቢሆን በሰጠው እና በተለምዶ ታላቁ ትዕዛዝ ብለን በምንጠራው ምንባብ ‹‹ስለዚህ ሂዱና ሕዝቦችን ሁሉ…›› (ማቴ 28፡19) ነው ያለው፡፡ የግሪኩን ትርጉም በቀጥታ ከተጠቀምን ‹‹ሕዝቦችne hulu›› የሚለውን የአማርኛ ቃል ‹‹ብሔርሔረሰቦችን ሁሉ›› (Panta ta Ethne) በሚለው መተካት ይቻላል፡፡ ስለዚህም ጌታ ኢየሱስ ደቀ መዛሙርቱን ወደ ብሔር ብሔረሰቦች ሁሉ እንዲሄዱ ነበር ያዘዘው፡፡ ዛሬም ለቤተክርስቲያን የሚለው ይህንኑ ነው ‹‹ወደ ብሔርብሔረሰቦች ሁሉ ሂዱ››፡፡

ወደ ብሔረሰቦች በመሄድ ወንጌል ለመስበክ ስንነሳ ታዲያ ከላይ ካየነው የተልዕኮ አዙሪት የሚገላግለን ራሱ ጌታችን ኢየሱስ ክርስቶስ ነው፡፡ የዐውዳዊነት የመጨረሻው ትልቁ ምሣሌ ጌታችን ኢየሱስ ክርስቶስ ነው፡፡ ጌታ ኢየሱስ እንደማንኛውም ሰው ከሴት መወለዱ የተላከለትን ሕዝብ ለመግባባት ጠቅሞታል፡፡ መሌዐክ ሆኖ ቢወለድ ኖሮ ግንኙነቱ የሰው አይሆንም ነበር፡፡ የሕዝቡን ቋንቋ ይናገር ስለነበር መናገር የፈለገውን ይናገር፣ ማስተማር የፈለገውን ያስተምር ነበር፡፡ የሕዝቡን ባህል አክብሮ ኖሯል፡፡ ስለዚህም ከሰዎች ጋር በቀላል ይግባባ ነበር፡፡ ሰዎች ሊረዷቸው የሚችላቸውን ምሳሌዎች በመናገር ከሕዝቡ ጋር በቀላል እንዲግባባ አድርጎት ነበር፡፡

እንግዲህ የእምነታችን ጀማሪ እና ፍጹም አድረጊ የሆነውን ጌታችን ኢየሱስ ክርስቶስን በመመልክት ሩጫችን በመሮጥ አዙሪቱን እንግታ፡፡ ብዙዎች በራሳቸው ባህል ብቻ ታጥረው ባሉበት ዘመን ለእግዚአብሔር ክብር እና ለሰዎች መዳን ብለን  ጌታችን ሰማይን እንዳቋረጠ እኛ ደግሞ ባህል አቋርጠን ያልተደረሱትን ጎረቤቶቻችንን በከተሞች እና በገጠሮች እንድረሳቸው፡፡ አዙሪቱም ይገታ ፤ ተልዕኮውም ይፈጸም!

Pin It

Comments powered by CComment